都話漢奸黎旗下壹淫媒變賣台灣總部大樓，班水四億五千萬元係為咗填氹救亡嘅啦，果然，淫媒最新公布半年錄得巨額虧損達二億八千幾萬元，過去八年半更加蝕足超過廿億，不過嘥氣喇，壹淫媒宣淫販賤，反中亂港，早被讀者唾棄，要填滿呢個財政黑洞，分分鐘難過明日大嶼起人工島，漢奸黎與其割肉補瘡苟延殘喘，不如索性摺咗佢冇咁嬲。
係人都知壹淫媒最鍾意老作新聞，估唔到吹噓公司業績，一樣係吹水唔抹嘴，好似淫媒旗下數碼業務，漢奸黎吹到識飛咁滯，到頭來又係蝕到入肉，淨係今年已經蝕近五千萬，按年大增一倍有多；至於香港同台灣兩地「爛果報」嘅表現，更加係黃腫腳──不消提，廣告收益全線下跌三成。
講開廣告業務跌跌不休，漢奸黎口口聲聲話係「政治打壓」喎，台灣獨派反中勢力當道，夠晒同聲同氣嘞啩，廣告收入咪一樣好似王小二過年咁。好簡單啫，人同此心，心同此理，壹淫媒唯恐天下不亂，去到邊度都搞到雞毛鴨血，神憎鬼厭咯喎，憑咩吸引廣告吖！
家陣個局好清楚嘞，壹淫媒蝕極都未完，賣台灣淫媒總部嘅四億幾，唔係好襟燒嘅咋。再講吖，該物業之前抵押咗畀銀行，扣埋還款所需，所餘無幾，正如證券業人士話齋，壹淫媒醫番都嘥藥費，投資者切勿貪平撈底。講真，市民就算有多個閒錢，都買定花生同蠟燭紙船，等住送壹淫媒上路好過喇。
漢奸黎叫得做漢奸，自必然比常人厚顏，既然連「親生仔」《壹週刊》都插標出售，不惜自認「契弟」，為咗賴死有咩做唔出？之不過做契弟都講食腦，好似壹淫媒咁做到個招牌爛晒臭晒，想搵人接火棒都難。計功夫茶話齋，漢奸黎為今之計係向多年嚟收買過嘅政客埋手，話晒漢奸黎咁多年嚟向反對派供食供住，淨係佔中前兩年嘅政治黑金大大話話都成四千萬，依家主人有難，正是看家犬報恩之時，咁當然喇，物以類聚，人以群分，佢老哥賣國賣港求榮，班政棍都唔慌係好人，「報恩」就肯定冇份嘅嘞，唔踩多兩腳已經偷笑。
壹淫媒「節流」無方，或者應該認真考慮點樣開源。家陣狂人特朗普大講「美國優先」，洋狗餅已經斷糧，漢奸黎何妨改換門庭，公開向北大人下跪悔過，宣誓再唔做洋走狗，改做紅走狗，話唔定博得紅色奶媽心軟繼續統戰，又可以吊多一陣鹽水。真係有得諗㗎，漢奸黎不嬲有奶便是娘，有錢便是爹，近排連連自打嘴巴為「一帶一路」大唱讚歌，唔通有景轟？