政情：楊偉雄講創科 唔怕AI打爛飯碗
科技日新月異，人工智能（AI）亦漸趨成熟，連捉棋都勝過人腦，未來分分鐘可以取代部分職業，都咪話唔令人擔心。不過創新及科技局局長楊偉雄反而話唔使杞人憂天，唔通佢睇小科技嘅發展？
楊偉雄尋日同一班青年大談創科，被問到AI愈見普及，甚至有人話未來會取代部分行業，青年人要點樣居安思危時，佢就大派定心丸直指呢個諗法有少少杞人憂天，因為不同年代都有新工種出現，青年人透過不斷學習去轉型，轉型能力愈強，不論面對AI、BI定CI都無問題喎。
樂觀有過億份新工出現
佢更講到，早前有報告講自動化技術同智能科技會取代超過七千萬個工種，聽見都好驚，但報告其實都指出隨住公司重新規劃同分工，會有過億份新工作產生，估計去到二○二二年都已有超過五千萬個新工作崗位，會係更高增值、更好同更適合年輕人嘅工作咁話。唔知道佢呢番說話能唔能夠安撫到對未來不安嘅年輕人呢？