政情：內地興外賣App 搶李文俊生意
外賣應用程式（App）近年興起，本港同內地都唔少人鍾意用嚟叫外賣，貪夠多選擇吖嘛！百仁基金會長李文俊尋日喺傳媒午宴時講起，原來佢喺海南嘅酒店都有唔少客人，夜麻麻着住浴袍喺大堂等外賣，酒店餐廳嘅生意都差咗少少，但佢都明白因為外賣應用程式，可以叫好多間餐廳嘅外賣，選擇好多，例如佢去杭州工作，同事都話要用外賣應用程式叫小龍蝦嚟食。
鼓勵年輕人感受內地生活
依家網購好方便，李文俊話亦令到佢嘅生意好難做，一件貨品成本係一百蚊，以往可以賣一百五十蚊或二百蚊，依家網購競爭激烈，就淨係賣到一百一十蚊或一百二十蚊，利潤少咗好多，雖然覺得幾辛苦，但都應該要堅持做實業。
佢又話內地比起幾十年前已經唔同咗好多，有啲員工唔肯返香港住，寧願住喺東莞，兩三千蚊已經租到一千平方呎，鼓勵年輕人多啲返內地，感受吓內地嘅生活，先能夠諗到有乜嘢新發展機會。