政情：吳永嘉大寫包單「打排球只瘀一次」
立法會議員吳永嘉（Jimmy）係羽毛球高手，曾經打過入羽毛球青年軍，球技絕對有保證，但羽毛球以外，佢對排球都有相當大興趣。Jimmy話羽毛球同排球動作有九成相似，好似兩者嘅扣殺動作都係差唔多嘅姿勢，所以識打羽毛球嘅人可以好快上手打排球咁話，聽落好似幾有心得。
手臂痛嘅感覺好爽
羽毛球等球類運動可以用球拍打波，但排球就要直接用手臂去擊球，所以打到周身瘀痛在所難免，唔少人都因而對排球卻步。不過Jimmy就大寫包單，話只會第一次打排球先會搞到手臂瘀晒，而佢當年都搞到手臂紫晒，但只要瘀過第一次，往後無論點打都唔會再瘀，就連佢多年無打排球再打都只會痛啫，仲話呢種感覺好爽喎。
仲記得Jimmy呻過冇乜議員同佢打羽毛球，但排球隊人數要更多，怕且佢仲少機會可以打排球囉，但唔知聽完佢咁講，會唔會吸引到人接觸排球呢？