政情：同志議案防梁美芬騎劫 慢必冧掂葉劉阻截

議員議案要經分組點票，慢必承認自己提出嘅議案通過機會甚微，更甚者係梁美芬提出嘅修正案將原議案的「研究制訂讓同志締結伴侶關係的政策」等字眼刪去，改為尊重「一男一女」、「一夫一妻」婚姻制度等字眼，慢必炮轟梁嘅做法等同將致謝議案變成譴責議案，誓言要全力阻止。

拉攏民記議員 投票時「行開一吓」

目前建制派喺功能界別有優勢，喺地區直選就只係多泛民一票，所以慢必將目標放喺直選議員身上，務求拉攏兩、三名建制直選議員對梁嘅修正案投反對或棄權，又或者屆時離開座位。佢透露，已成功說服葉劉支持自己議案，並反對梁嘅修正案。

慢必同葉劉喺同志平權議題「行埋」並非首次，上月喺立法會政制事務委員會開會時，葉劉曾批評政府唔使猛講要維護一夫一妻制，令慢必勁冧。其實葉劉一向喺性小眾議題都十分敢言，佢日前喺一個論壇上自揭當年讀女校時，唔少同學以Tomboy打扮佢都覺得無問題，仲話唔同國家嘅性別認同門檻都有別，批評香港就相對落後，甚至連內地都比唔上，日後香港如果要立法就要處理反歧視問題，而其他相連嘅修訂，例如身份證等都要去做，社會設施都要作出相應配合，仲大嘆依家要立法同社會接受有漫長嘅路程。

慢必又話已成功說服部分民建聯直選議員喺投修正案時「行開一吓」，嚟緊嘅目標係工聯會嘅直選議員。至於泛民陣營，佢所屬嘅議會陣線同公民黨所有人都支持原議案，專業議政就話大部分人會支持，而手執七票嘅民主黨，佢相信只有涂謹申嘅取態會有所保留。

另外，有同志界代表指假如慢必喺海外與同性伴侶結婚，但按現行機制唔需要作配偶利益申報，係一個好大漏洞，呼籲建制派支持慢必嘅動議。慢必就笑言目前單身，未來一年無可能結到婚，但揚言假如泊到好碼頭，例如與同性嘅地產商拉埋天窗，會主動提出利益申報喎。