中環出更：政府修例唔清唔楚 蔣麗芸發火
人同人之間相處有時唔使乜都講到明，但法例就啱啱相反，寫得愈仔細愈清楚就愈好。立法會《2018年選舉法例（雜項修訂）條例草案》委員會尋日開會，就條例進入逐條審議階段時，議員蔣麗芸（Ann）似乎對某啲修訂唔太滿意，窮追不果下寸政府：「三個臭皮匠都勝過諸葛亮啦，你哋政府成十五個人坐喺度都答唔到！」唔知乜嘢事搞到阿Ann咁火滾？
當時其實傾緊一項修訂，關於當有人提出反對其他選民嘅選民資格時，要提出充分嘅理據，政府解釋有關修訂係可以等審裁官有足夠資料做決定，而阿Ann就對「充分」嘅定義表示疑惑而追問政府，結果政府舉例話如幢樓已經拆咗當然夠充分，但如果只係個住客好少見、信箱成日爆滿就提出反對，可能就要多少少證據，點知阿Ann聽完就係一聲冷笑，之後就話：「我個信箱都成日爆啦，唔通又可以質疑我嘅資格？」
質疑擾民 寸差過臭皮匠
阿Ann之所以咁火，其實係覺得如果「充分」嘅定義唔清楚，咁會影響修例原意，依然會搞到有選民無端端要請假上庭，非常擾民之餘，仲係間接唔鼓勵市民做選民，所以先嬲到要寸在座嗰十五位政府官員不及臭皮匠，最後政府都有解釋係唔想市民基於個人憶述就提出反對，之後會補番詳細書面解釋畀阿Ann，至於阿Ann會唔會收貨，就要到時先知喇！
卓妮