中環出更：風濕腳發作 單日堅即知落雨準過天文台
鍾意運動嘅人可能郁得多，都特別容易受傷。懲教署前署長單日堅都唔例外，佢早前喺馬場講起，自細鍾意做運動，足、籃、排、乒都有玩，細個打籃球成日整親，兩隻腳屈親至少十次，踢波守龍門就試過「篤魚蛋」，嗰陣受傷唔識驚㗎，依家慢慢就風濕痛嘞，「無端端突然痛，原來落雨喎」，真係準過天文台呀！
單日堅話足球、籃球需要好幾個隊友，加上碰撞比較大，年紀大咗就只會打乒乓波，以前一星期至少會打一次，依家工作忙就少咗嘞，仲回憶起好細個嘅時候冇乒乓波枱，搵食飯枱對住牆嚟打，同埋喺地下整個網後就打添！佢又話三、四十年前剛開始做gym，但一直唔會為咗維持身材就乜都唔敢食，自己好為食㗎，食嘢方面唔會虧待自己。
鄭錦鐘同太太學普拉提鬆筋
講開健康，保良局前主席鄭錦鐘就話同太太鄭關巧妍都有跟健身教練做gym，仲有去學普拉提（Pilates），鍛煉吓啲小肌肉同拉吓筋，發現自己左後腰特別緊，唔知係咪因為坐得多，仲笑指「可能自細姿態壞」。佢話好似佢咁嘅年紀嘅一代，後生時就用健康去換錢，依家就要用錢去換健康，好注重自己嘅健康，因為老人家有乜嘢病痛就會令到仔女辛苦，加上子女可能已經生咗小朋友，又要揹上一代，又要揹埋下一代，真係戥啲後生嘅好辛苦咁話喎。
轉個頭又見到做開攝影器材生意嘅孫大倫同太太孫鄧秀英（Betty）齊齊入馬場，兩個着衫仲襯晒色添！孫大倫講起，最近同太太去咗美國肯塔基州睇打吡賽，聽講觀眾有成十四萬人，好多入場嘅女觀眾都有戴好大頂帽，Betty就話以為活動完咗之後，啲帽會平啲，點知當地嘅朋友話唔會㗎，佢哋平時都會戴咁大頂帽出街㗎喎。
卓妮