政情：柯仔回鄉參觀郵局 恍如歐遊
立法會議員工作忙碌，開會時間又長，議員得閒都要離港去玩鬆一鬆。議員柯創盛（柯仔）喺立法會連開三日會議之後，尋日就趁周末返鄉下潮汕行吓，仲去參觀當地歷史悠久嘅郵局，睇吓啲同郵政相關嘅展品。
笑稱頂郵差帽意頭唔好
不過，當佢見到當地郵差曾經使用嘅郵政帽時，就笑笑口話頂帽係綠色，「意頭唔好」喎，真係百厭。
本身都係觀塘區議員嘅柯仔尋日就同另一名觀塘區議員歐陽均諾及九龍東潮人聯會常務副會長楊諾軒一齊去咗佢鄉下潮汕一帶，仲特登去參觀當地一間郵局，事關呢間郵局係文物保護單位嚟嘅。當佢見到郵局有外國建築物特色時，直言以為自己去咗歐遊。柯仔對郵局入面嘅展品如郵箱、郵差用嘅單車同帽等都好感興趣，仲成個導覽員咁，一一講解畀身邊兩位朋友聽。
柯仔一路行郵局就一路拍片兼喺社交網站Facebook（Fb）做直播，仲好得意話自己喺內地都用到Fb，質疑聲稱喺內地會玩唔到Fb嘅人係誤導他人喎。