政情：吳得掂食煙斷正 死撐只試咗一啖
鮮有喺公開場合食煙嘅教育局前局長吳克儉（吳得掂）上月被發現喺旺角一間酒店外嘅吸煙區度食煙，日前再見到吳得掂，問起佢食煙斷正一事。佢就話自己係冇煙癮嘅，當日只係因為朋友同佢講嗰款煙喺市面上係買唔到，所以先至試咗一啖，之後已經冇再食咁話。不過佢當日食煙動作純熟，真係信不信由你。吸煙始終危害健康，都係少食為妙喇。
熱心研究太空種植
而吳得掂卸任局長之後，就熱心研究太空種植，繼之前去西安睇航天育種計劃後，佢最近就搞緊一個香港同中山合作嘅「太空種子」計劃，即係將各種唔同種子射上太空，比較一下邊款種子嘅生命力最強，再選擇出一種種子大量種植，從而種出最優質嘅農作物，例如大豆同粟米喎。睇嚟佢對太空種植食物都好有興趣噃。