政情：孔誕變公眾假 擬向復活節開刀 勞福民政鬥推莊

宗教界爭議大 勢惹反彈

馬逢國話，為打工仔制訂公眾假期係勞福局負責，至於係為咗乜嘢內容去放假呢，就由民政局去釐定，所以要將孔聖誕日訂為公眾假期，兩個局都責無旁貸。不過，佢批評兩個政策局嘅態度「卸得就卸」，互相將牽頭責任推來推去，搞到至今仍未有任何進展。無人肯認頭，爭取者惟有用「大包圍」方式爭取，例如馬逢國早前在立法會向勞福局提書面建議，至於孔教學院院長湯恩佳就透露曾去信民政局爭取。但係無論問邊個部門都好，結果都係等候回覆。

政府消息人士透露，其實政府早已為孔聖誕日「升呢」做公眾假期鋪路，例如孔教學院喺今年九月孔聖誕日活動，勞福局局長羅致光同民政局局長劉江華都有出席，消息人士更指，當日只有劉江華上台發言，其實已經暗示稍後將會交由民政局負責。

據了解，現時孔聖誕日「升呢」公眾假期嘅最大爭議係來自宗教界。根據法例，香港公眾假期每年有十七日，將孔聖誕日「升呢」意味要將目前一日公眾假期作替換，而湯恩佳等支持者早就開聲話要用復活節最後一日假期換做孔聖誕日，自然引來相關宗教反彈。

據悉政府未決定係咪採用取消一日復活節假期嘅方案，但考慮到屆時好大可能要擺平各方宗教勢力，所以最終敲定由民政局負責牽頭處理。至於另一重要考慮，係勞福局未來要集中精力處理取消強積金對沖呢座大山，所以唔想再加重勞福局負擔。

馬逢國：最緊要有人孭飛

馬逢國就話，唔理邊個局都好，最緊要有人孭飛，唔係繼續原地踏步，都唔知要再等幾多年先可以等到孔聖誕日「升呢」做公眾假期。