管治大學財政、人力及未來發展的校務委員會，對一間大學好重要，香港大學校務委員會學術人員校委席位前日進行選舉，共收四百七十九張有效票。選舉結果塵埃落定，來自內地嘅經濟及工商管理學院教授陳志武、土木工程系教授岳中琦，同埋來自台灣嘅微生物學系副教授高一村當選，三名校委尋日起陸續上任，任期三年。至於兩名香港學者，即牙醫學院教授姚嘉榕同心理學系副教授張星恒落敗，無緣進身校委會。
今次學術人員校委有五名候選人爭奪三席，包括填補早前涉嫌殺妻被捕嘅機械工程學系副教授張祺忠席位，張嘅任期下月屆滿。
教授級學術人員校委兩席，由得票一百八十票的陳志武及得票一百零二票的岳中琦當選，擊敗得票九十票嘅姚嘉榕。陳、岳分別喺尋日同本月二十日上任。非教授級職員一席，高一村得五十六票，擊敗得五十票的張星恒，高下月九日上任。
另外，廣播處前副處長戴健文再度連任為港大校委，佢喺一五年從港台退休後以港大畢業生議會委員身份加入港大做校董，獲校董會選入校委會，近日再度獲校董選為校委會代表。
港大學生會會長黃程鋒希望校委可敢言為學生發聲，並認同港大管治有漏洞，同學生一齊改善大學嘅管治。佢又話港大管治漏洞包括特首校監必然制，應要廢除。