政情：打尖傾沙中線 大聲公鬧事 峯鴿又累區會流會

唔識議程程序 講大話屈秘書

中西區區議會交通及運輸委員會會議尋日下午兩點半召開，原定討論中環灣仔繞道嘅工程進度同香港電動方程式大賽等多項議題，但峯鴿同吳兆康喺會議一開波就投訴主席陳財喜濫權，認為陳以主席權力拒絕將沙中線相關議程加入是次會議，認為對方係礙於政治敏感而拒絕討論。陳強調並冇剝削議員提出議程嘅權力，解釋拒絕原因係認為目前沙中線問題屬工程範疇，並冇迫切性於交運會討論，反建議二人喺明年一月舉行嘅區議會大會討論。

跟住峯鴿同吳兆康就同陳財喜爭論沙中線議程嘅迫切性，又多番指會議秘書事前話咗可以傾，秘書即場攞咗封電郵出嚟，話當時只係確認峯鴿係咪同吳兆康交換文件，至於係咪可以加入議程係要主席做裁決同批准嘅，而討論文件係以先到先得方式排上議程，若有議員選擇撤回文件，遞補嘅文件亦會由候選名單順序補上。當場被踢爆講大話，但峯鴿仍然咬住唔放，期間有議員批評佢「屈」秘書，另一議員李志恒批評峯鴿唔清楚提交議程嘅程序，卻反咬主席濫權，行為有如思覺失調。

擾攘近一個半小時仍未開始討論繞道工程議題，峯鴿以大聲公「鬥大聲」發言，阻礙主席陳財喜宣布進入下一個議程，陳禁止許使用大聲公不果，連續二十多次要求對方離場亦遭拒絕，最終宣布流會，令近二十位準備前來開會的政府官員及機構代表門外白白呆等。

兩度停會 10區議員聯合譴責

喺流會後，包括陳財喜在內十名區議員發聯合聲明，批評喺峯鴿嘅滋擾下，已令交運會嘅會議停頓咗兩次，至今峯鴿嘅滋擾行為已導致中西區區議會流會達五次之多，對峯鴿予以譴責同遺憾。