中環出更：斥政府禁電子煙 張宇人：宗教都有害
政府上個月喺施政報告提出要全面禁止電子煙，旋即引起社會上唔少爭議，對一眾「煙民」嚟講更加係直接受到影響。身兼行政會議成員嘅立法會飲食界議員張宇人（Tommy）都係煙民，佢尋日喺立法會辯論施政報告時大發雷霆批評政府禁電子煙，仲話宗教都可能有害，反問政府係咪都要禁，糖食得多都有問題，又係咪要管，認為政府唔應該動不動、郁啲就講食幾多糖、幾多鹽、幾多朱古力係唔啱咁話。
指極權剝削少數人權利
反對政府禁電子煙嘅Tommy話，政府取得立法會多數議員支持禁電子煙同煙草，係多數人嘅極權剝削少數人嘅權利，又話︰「宗教都可能有害，政府係咪要禁？糖食得多有問題，係咪又要管？」佢又提到多年前英國查理斯王子曾提出要禁止連鎖快餐店，因認為兒童應該食得健康啲，但就引起激辯，直言企喺道德高地係好容易。佢又話香港已經係最長壽嘅地方，質問政府仲要嚴管市民生活習慣係咪適合。
佢直言作為煙民，見到由政府禁止喺工作間吸煙開始，控煙政策不斷收緊，覺得喺兩者取其輕嘅情況下，政府不應「急轉彎」禁止電子煙，否則係一種倒退喎。Tommy喺勞工問題上嘅言論對打工仔嚟講一向惹火，但呢番言論唔知會唔會令一眾煙民叫好呢？
卓妮