為咗紓緩學童壓力，近年要求「無家課日」嘅呼聲高漲，日前立法會教育事務委員會亦通過無約束力議案，要求教育局研究長假期「無家課日」。尋日教育局常任秘書長楊何蓓茵與深水埗區議會議員會面，民協何啟明講起香港嘅教育制度只為考試，希望搞「無家課日」斷絕催谷心態。楊何蓓茵就話，唔贊成機械式操練嘅家課，但外國有研究指，長假期完全冇家課，退步得較多嘅係經濟能力較低嘅學生。照咁講，唔通教育局心中已有定案？

何啟明話，好多人嘅心態係入唔到大學就冇出路，當局有咩辦法可以改變教育觀念嘅問題。楊一聽完就有火，稱好多人話香港教育制度有問題，係濫用咗制度呢個字，強調教育局從來冇話畀學生、學校或家長聽，入到大學至係唯一嘅出路。

佢又話，冇制度係完美，明白社會要求增加大學學額，但當局亦提供職業專才教育等多元出路，亦希望做好家長教育，唔好以為子女讀大學先有出路。講真嗰句，如果教育局推行嗰套係有用嘅，就唔會有咁多怪獸家長啦！

卓妮