開講有話，「世上沒有無緣無故的愛，也沒有無緣無故的恨」，睇吓特衰政府點處理南亞假難民問題就知所言非虛，無論南亞村有幾烏煙瘴氣罪惡滔天，港府都係拆啲唔拆啲，如果唔係對假難民存有畸形嘅愛，又點會有呢啲咁詭異嘅安排吖。
呢，港府早前喺南亞村貼出「最後通牒」，要求限期前搬走，點知一拖再拖，拖到尋日先做嘢，警方、食環署加埋民政處成三十幾人浩浩蕩蕩，但係用咗成個上晝都只係拆得七間木板屋咁大把，留番五間唔捨得拆。話就話清拆行動今日繼續，但係聽住先啦，事關當局已多次派人清拆南亞村，但唔係除惡務盡，而係小打小鬧，結果就野火燒不盡，春風吹又生。
真係諗極唔明，南亞村係非法僭建物，多由木板紙皮釘成，要清拆本來唔係難事。當局之所以龜速清拆，講到底都係割捨唔到對假難民嗰份既深沉又持久嘅愛。既然拆得咁委屈咯，就索性一間都唔好拆，兼夾由政府出錢大興土木，用一級柚木代替甩皮甩骨嘅爛木，再附送傢俬電器，將南亞村打造成難民理想安樂窩，形成別具一格嘅風景，話唔埋可以為港增光添呀。
你知喇，家陣提起難民問題，全世界都牙痛咁聲，美國總統下令喺美墨邊境建現代萬里長城，堵塞中南美洲難民唔在講，奧地利、匈牙利、捷克、波蘭亦先後退出聯合國難民協議，就連最講博愛人道嘅西歐國家都紛紛對難民關上大門。獨係香港繼續中門大開，對難民來者不拒，唔止送上人道津貼，仲貼埋錢打官司，假難民唔湧港食大茶飯，點對得住港府呢份深情厚意呀。既然港府係都要充大頭鬼咯，唔好淨係向南亞幫高呼「香港歡迎你」，直頭向全世界難民招手，將美國拒收嘅「大篷車」難民、意大利唔要嘅非洲難民吸晒過嚟，下年諾貝爾和平獎桂冠簡直非林鄭莫屬。
港府成日被人批「守財奴」，其實睇對象嘅啫，官老爺對香港人就斤斤計較，對假難民不知幾大方，淨係過去五年，喺假難民身上就狂燒公帑五十億元，將來只會多多益善。劣幣驅逐良幣，結果就係港人爭相移民逃難，假難民爭相湧來填補空缺，遲啲香港咪可以改稱「難民港」、港府咪可以正名「香港難民特區政府」囉，唔爭在成立埋假難民局，由假難民之父張超雄任局長，招聘本地黑幫及南亞兵做副局長、政治助理，實踐高官政棍所謂嘅大愛無疆。
好心林鄭咪日日廢話「與民同行」喇，改為「與假難民同行」，咁至名副其實吖嘛！