政情：莫乃光體驗失明 莊陳有做盲公竹
有冇諗過雙目失明係咩感覺？立法會議員莫乃光（Charles）就試過喇，不過佢唔係盲咗，而係早前參加「國際白杖日」活動，同二百幾人一齊蒙住對眼、手放膊頭咁行四百米跑道。Charles話，初初蒙住對眼行路好驚，不過行咗一陣就覺得要對身邊嘅人有信心，所以就決定豁出去，任由香港失明人協進會會長莊陳有帶路。
Charles話，當日莊陳有戴咗個套用汽車自動導航系統技術嘅儀器，透過超聲波感應器偵察路面障礙物，同埋辨認跑道線。不過活動當日可能因為跑道上嘅界線有啲甩色，影響到儀器運作，所以試用宣告失敗。
唔少失明人士要用「盲公竹」輔助行路，Charles話隨着科技發達，已有人設計手機應用程式，等盲人透過耳機連接手機去掌握路面情況，但前提係要喺路面安裝感應器，不過因為成本高而仲喺研究當中。佢話政府應帶頭喺政府大樓安裝感應器，以帶動更多機構跟隨。