政情：深水埗區會 響警鐘會照開 否決反明日大嶼議案
明日大嶼填海計劃備受各界爭議，外界憂慮造價過高。深水埗區議會多名泛民議員稱「明日大嶼」計劃勞民傷財，提出堅決反對政府「盲填海」嘅議案。尋日區議會開始審議冇幾耐，消防鐘聲即大響，似係為明日大嶼響起警號。不過當時泛民仍未齊人，民協衞煥南同報稱獨立嘅吳美「失蹤」，最令人費解係區議會主席張永森完全無意叫停會議，仲同深水埗民政事務專員李國雄咬耳仔，懷疑「打龍通」，繼續扮懵開會，結果喺唔夠人情況下倉促投票，最終議案遭否決。
唔齊人下照投票
話說第一個議員未完成發言，消防鐘聲已經大響，但張永森繼續交代發展局未能派人出席會議，並指示下一位議員發言，之後佢同李國雄多次咬耳仔，似係交換意見，又向區議會職員了解點解警鐘會響，完全無意暫停會議，會上亦冇議員要求暫停。
警鐘曾停過一陣，但好快又再響起，其時泛民一直唔齊人，獨立嘅甄啟榮發言表明反對明日大嶼計劃，更指過往嘅施政報告講到天花龍鳳，但貨不對辦，之後冇人再要求發言。張永森乘機喺鐘聲大響下指示投票，咁大爭議嘅議案傾咗唔夠半小時，最終以十票贊成，十一票反對，否決有關議案，正正欠缺衞煥南同吳美兩票。
主席竟話聽唔到
據知，今次消防鐘響係誤鳴，期間升降機暫停，只可以行樓梯。有泛民議員坦言，今次投票較預期至少早咗一小時，期間已多次催促不在場嘅議員返嚟。會後問張永森，點解鐘聲大響都唔暫停會議，張永森竟然話聽唔到，可能耳仔唔好喎。嘩，真係呃細路都唔信啦，聽唔到消防鐘，又會聽到議員講嘢？睇嚟張永森聽唔到嘅並非消防鐘聲，而係廣大市民反對明日大嶼嘅怒吼！
話時話，最近消防處先至推出吉祥物「任何仁」，目的係提高市民應急能力，點知張永森即刻作出錯誤示範，明知疑似火警發生，竟然唔諗疏散，就算令一班議員身陷險境，都要夾硬否決反對明日大嶼動議，真係不惜一切！
