中環出更：盧偉國私房菜宴客 黃家和畀五粒星
工程界立法會議員盧偉國（WK）嘅廚藝一向唔錯，間唔中都會喺社交網站露兩手，睇到大家流晒口水。香港餐飲聯業協會會長黃家和（Simon）等人早前獲邀到WK屋企享用家宴，仲將「盧家私房菜」逐一影相放上Facebook，Simon對食物質素同埋主人家安排嘅餘興節目讚不絕口，話要畀「五顆星」喎！
當晚上枱嘅私房菜包括秘製蜜汁叉燒、元蹄粉葛煲靚湯、濃味蝦子煨十四吋豬婆參、糖心吉品鮑魚炆北海道花菇同埋雞蛋焗魚腸等。Simon對雞蛋焗魚腸最念念不忘，佢話呢味餸已幾乎失傳，因為好花時間及工夫，外面酒樓食肆已經食唔到。盧太好畀心機，用十五副魚腸加十五隻雞蛋，再用油炸鬼鋪面一齊焗，味道一流。
有份去擦餐飽嘅仲有香港工業總會前主席鄭文聰、財經事務及庫務局前局長陳家強等人。WK話，呢個飯局係為咗答謝Simon早前招呼佢去法國酒莊玩，而今次菜式嘅特色係古早味。鄭文聰及陳家強都去過Simon嘅酒莊，雖然唔係同WK一齊去，但係大家回憶喺酒莊嘅點滴，好有共鳴。
盧太清唱 WK奏琵琶
鄭文聰話餐飯樣樣都好食，仲賣口乖話WK係超級廚神喎！Simon就話，主人家用咗一星期去準備，好有心機，最難忘係餘興節目，WK獨奏琵琶，盧太就高音清唱。鄭文聰都有同感，形容WK係工程界嘅奇才，因為琴棋書畫樣樣精通。聽到老友讚聲連連，相信WK咁大陣仗準備呢餐飯，都值喇！
卓妮