政情：立會餵野雀 一樣無王管
餵飼野生雀鳥嘅出發點可能係好，但野雀衍生而嚟嘅衞生問題就不容忽視，小則被雀屎整污糟地方，嚴重嘅仲可能傳播疾病。立法會議員周浩鼎（Holden）近日收到市民投訴，先發現原來私人地方餵野雀係冇法例可規管，假如有人喺立法會餵野雀，其實都係無王管嘅。
周浩鼎促政府正視
Holden話，現時任何人士餵飼野鴿等野生雀鳥而整污糟公眾地方，會有食物環境衞生署人員執法，如被檢控，就會被罰款一千五百元。但係如果喺私人嘅公開地方如屋苑嘅平台同公園，就算有人餵野雀，都冇法例規管。佢坦言︰「執法人員唔去理，法例又冇賦權業主去阻止呢啲行為」，屋苑保安冇法例可循，所以如果餵雀嘅人堅持唔走，亦係無可奈何。
立法會都屬私人地方，咁係咪都係無王管呢？Holden就話，如果有人堅持喺立法會嘅公開地方餵野雀，都唔算觸犯法例，如果政府繼續唔理，任由呢啲情況發生，以後返立法會開會最頭痛嘅可能係避雀屎喎。