政情：「唔太適應政黨文化」 黃宇翰退出新民黨
新民黨四年前同公民力量（公記）結盟，公記有十九名區議員一併加入新民黨，令該黨地區實力增大。不過，該黨近年多次爆出退黨潮，我哋早前就提過原為該黨中委嘅沙田區議員黃宇翰計劃退黨。黃前晚（1日）就喺社交網站發貼宣布退黨，但仍然會留喺公記，同時亦會同其他議政團體加強合作咁話。
自爆七月已向葉劉遞信
黃幾個月前喺區議會和議一項反對馬料水填海工程嘅動議，同新民黨立場唔一致，其後傳出佢退黨傳聞。黃喺貼文自爆早喺七月已正式向黨團同主席葉劉淑儀提交退黨信，該黨仲曾經挽留。究竟乜嘢原因令佢咁堅持退黨呢？
佢就話自己喺公記十多年，早已習慣有商有量、求同存異嘅相處同合作模式，但公記同新民黨結盟後，可能因為佢性格較有主見，所以唔太適應加入政黨後嘅運作同文化，未能配合要求統一嘅政黨要求，經常對該黨造成好多不必要嘅干擾。唔知佢咁講係咪暗示新民黨冇商冇量，唔能夠求同存異呢？