政情：考慮收回罪人論 陳健波同泛民講條件

要對方應承勿盲目反填海

陳尋日話，如果泛民先應承唔盲目反對填海、肯公正審議項目，佢就會考慮收回言論同道歉，又拎出當日電台訪問嘅逐字紀錄，解釋當時只係講出財委會修改會議程序後嘅分別。而要求討論不信任動議嘅議員郭家麒就直斥陳唔適合做財委會主席，因為主席要為公帑把關，但陳未開會就先惡意批評，令議員及公眾對財委會失去信心。議員譚文豪亦炮轟陳唔公平係有目共睹，寸爆陳當選主席並非能力高，只係票數多。

至於建制派就唔支持浪費時間去傾不信任動議。立法會議員謝偉俊認為主席有需要解釋會議安排，但就要慎言以減少麻煩。如謝所講，陳今次真係講多錯多，自招麻煩喇。