政情：官員Hea做議員憤怒促設懲罰機制

被指Hea答講大話「耍議員」

尋日嘅立法會內務委員會（內會）會議上，有建制派議員就話近年就批地問題，向政府提出書面質詢，早幾年政府回應時就有資料，但今年就冇。佢就話，立法會有責任對政府工作提出質詢，但政府就「係咁意」回應，質疑官員到底係咪講大話，仲話事件牽涉行政同立法關係添，覺得做法不能接受，要求內會主席李慧琼向張建宗反映吓。

唔止一個建制派咁鬧，議員陳克勤都舉例話，喺上月底問過環境局局長黃錦星，有關四電一腦生效後衍生咗非法棄置，要求食環署提供數字，但當局就喺冇統計數字嘅情況下，自誇計劃好成功，求其Hea答就算數。呢個答案搞到克勤好唔滿意，仲質疑「可以咁樣耍議員嘅咩？」

泛民議員亦都鬧埋一份。議員郭家麒就話，試過整埋個表畀政府，但對方都拒絕作答，估計或係立法會盲目支持政府，變相縱容，搞到官員覺得到立法會浪費時間。

立會盲目撐政府 變相縱容

郭仲建議話，不如開個內會特別會議，邀請張建宗同所有官員出席，討論有關官員喺立法會大會嘅答問表現喎。

原來唔止大會，官員連事務委員會都一樣咁Hea。議員黃碧雲就提到，政府喺八月嘅一次事務委員會特別會議上曾經承諾會提交數據，但事隔兩個月，政府依然冇聲冇氣。黃建議，如果官員Hea答、唔答、拖延回答嘅話，立法會應該要有懲罰機制處理。另外，議員葉劉淑儀就批評官員嘅發言稿只有中文，但英文就欠奉，要求作出改善。

其實早喺今年五月，身兼財務委員會主席嘅保險界議員陳健波已經開班授徒，向百幾個官員指點迷津，教授點樣答問題，至今只事隔五個月，唔通班官員咁快就失憶？還是班官根本係聽唔入耳呢？睇嚟張建宗應該考慮吓家法侍候，唔係分分鐘要自己受！