政情：罪人論惹火 波哥遭泛民狙擊 陳振英焗住擔正

泛民向陳健波提不信任動議

波哥近日心口掛住個勇字，為撐「明日大嶼」發表「罪人論」，並預料十多小時就可以通過有關前期研究撥款，令到自己成為眾矢之的，泛民陣營亦如拾至寶，趁新一個立法年度甫開始，接連出招質疑波哥已失去主持會議嘅公平公正形象，其中泛民狙擊嘅首條戰線，就由議會陣線毛孟靜近日去信內務委員會主席李慧琼，要求於周五嘅內會增設議程，討論波哥主持財務撥款嘅公平公正及獨立性。據知李已決定不增設議程，而毛亦隨即提出，下周三大會休會辯論有關波哥未開會已劃線嘅做法。

至於另一條狙擊波哥戰線，就由公民黨新界西直選議員郭家麒做前鋒，佢尋日去信波哥，話根據財委會會議議程第二十一條，向波哥提出不信任動議，原因係波哥喺政府未交文件前，已經先入為主，就該議題「劃線」決定審議所需嘅時間，形容此舉猶如對持有唔同意見嘅委員作唔恰當攻擊，行為極唔負責任，令委員對佢失去咗基本信任，直指波哥已無法履行主席應有嘅職責。

對於泛民嘅步步進逼，波哥尋日都要現身「補鑊」，稱當日嘅言論係基於財委會修改會議程序後，較複雜嘅撥款一般要十多小時審議時間，而填海嘅前期研究屬於複雜呢一個類別，因此作出有關估計，佢強調只要議員提問精闢唔重複，到時會彈性處理。對於有泛民對佢提出不信任動議，波哥就嘗試「拆彈」，表明會另開特別會議處理，避免妨礙審議其他撥款項目工作。

無論如何，財委會討論波哥嘅不信任動議，睇怕係勢在必行，身為被狙擊目標嘅波哥，到時必然暫時退下來，由其副手陳振英頂上主持會議，應對泛民嘅全方位「挑機」，陳振英今次考牌戰真係危機四伏，因為若然處理得唔好甩轆頻生，泛民又有子彈再去玩轉財委會，假如建制派「撲火」失敗，財委會正副主席雙雙「出事」，到時就認真頭痕嘞！