政情：今日你上鏡：落區喜遇名伶 葉劉變小粉絲
唔少粉絲喺街上遇到偶像，或者都會忍唔住要求合照，就連新民黨立法會議員葉劉淑儀都唔例外。葉劉本身都人氣爆燈，過往落區時都有唔少街坊要求合照，但前晚佢就化身小粉絲，孖住兩位粵劇名伶羅艷卿同尹飛燕合照，仲擺埋上Facebook專頁添！
其實葉劉自小係粵劇迷，而前晚同佢一齊合照嘅羅艷卿，係佢其中一位鍾意嘅粵劇名伶，難怪佢即刻要求合照啦！不過話時話，粵劇係非物質文化遺產，而且近年唔少小朋友、年輕人都走去學吓唱粵曲，唔知葉劉會唔會有興趣唱吓粵劇回饋粉絲呢？
（互聯網）