政情：港鐵冧四線 余偉傑坐爸爸車避劫
早前港鐵四線齊冧，搞到香港交通癱瘓，市民鬧爆港鐵。唔知平時都經常坐港鐵嘅百仁基金副主席余偉傑有冇受影響？余偉傑就話，其實佢返工多數都會坐佢爸爸余國春嘅順風車，港鐵四線齊冧當日都唔例外，所以就避過一劫，唔使逼幾個鐘頭。不過，佢收工就多數搭港鐵，畢竟公司樓下就已經係港鐵站，實在好方便。咁睇嚟佢都算好彩，如果當日係收工先壞，咁佢可能有排等才上到車喇！
點解佢唔揸車呢？佢話，香港嘅交通網絡其實唔錯，以前喺英國讀書時，倫敦塞車塞到郁都郁唔到，相比之下，香港塞極都可以慢慢郁，不過塞車事小，冇位泊車事大，特別係旺區，冇車位嘅話都真係幾頭痕，再加上佢收工返屋企，只需坐幾個港鐵站，久而久之，咪唔鍾意揸車囉！