政情：西九立立亂立會換林健鋒𥄫住

西九文化區風波不斷，原本二百幾億元嘅撥款唔夠用嚟起全部工程，可能要發債解決，之後請外籍人士做藝術總監又受到質疑，近期仲要出現M+博物館嘅承建商被指陷入財困，西九管理局代承建商向分判商出糧，更觸發合約爭議，西九文化區管理局董事局上月更自揭，演藝綜合劇場及相關綜合地庫，鋼管樁牆出現滲漏，需暫時停止挖掘工程，預料啟用場地嘅日期好可能會延遲。

管理局如獨立王國 監察小組被動

外界一直批評西九管理局儼如「獨立王國」，立法會監察西九小組亦相當被動，每次都只可以喺西九出事後，攞吓文件，或者鬧吓西九管理局，真係相當無奈。今個立法會年度，監察西九小組將喺下月六日選舉正副主席，消息指將由劉國勳轉為林健鋒做主席，有指劉國勳已經做咗監察西九小組主席兩年嘞，喺不成文規定下，係時候要換人。唔知係咪因為咁，順便搵個行會成員去做呢個三煞位，望住西九唔好再出事。

傳陸頌雄將出任鐵路小組副主席

此外，立法會鐵路事宜小組委員會之前由邊個做主席都引起連串風波，呢個咁敏感嘅委員會，今日已經要打仗傾港鐵四線齊冧，而喺討論四線齊冧之前就要先選出正副主席，之前傳過由自由黨、航運交通界議員易志明做主席，副主席一職自然亦要搵番建制做先信得過啦！據知工聯會嘅陸頌雄將會接任做副主席，加上陸頌雄本身已經係政制事務委員會副主席，睇嚟都係覺得佢夠立場鮮明啦，唔知佢夠唔夠硬淨頂得住多場風波呢？