中環出更：陳茂波網誌伶仃洋寫錯「零伶洋」
香港以至珠三角一帶嘅地方，好多都同歷史好有關係，寫錯就真係笑死人。財政司司長陳茂波（波叔）尋日喺網誌講起港珠澳大橋通車，令唔少市民急不及待一試乘車橫渡廣闊浩瀚的「零伶洋」，相信波叔想講嘅係「伶仃洋」嘞！唔通波叔唔做發展局局長後，就開始唔識啲地方呢？
政府新聞網仍未改正
波叔喺網誌大講大型跨境交通基建，可以促進人流，吸引更多旅客，話港珠澳大橋通車首日好多人想橫渡「零伶洋」。可能知道自己寫錯字，下午波叔網誌已經改番做「伶仃洋」嘞，不過，政府新聞網引述網誌嘅內容，就仲可以見到「零伶洋」仲未改。
伶仃洋都相當有名，相信大家都聽過「人生自古誰無死，留取丹心照汗青」，正正就係出自南宋詩人文天祥嘅《過零丁洋》，時至今日，已經叫做「伶仃洋」嘞，唔通波叔想再幫呢個地方改名叫「零伶洋」？
卓妮