中環出更：黃繼兒憶舞會禁親密 英華校長睇到實
唔少戀愛故事都係由中學開始，但對於男校或者女校嘅中學生嚟講，可能就少咗啲機會喇！個人資料私隱專員黃繼兒（Stephen）以前就係男校生，佢尋日出席母校英華書院嘅活動時就話，其實都有機會識女仔嘅，事關學校每年都會搞一個舞會，邀請其他學校嘅女仔嚟跳吓舞，但一旦校長見到男女之間過於親密，都會即刻出嚟阻止，拉開兩人，仲會數足要相距幾多隻手嘅距離先得。真係夠晒小心！
男校邀請女生嚟舞會，睇落係大好機會，但其實都好多掣肘。Stephen話，英華書院係基督教學校，對男女之嫌睇得好重，所以就會有呢啲規矩，加上當時喺日頭舉行舞會，聽落似乎冇喺夜晚舉行咁浪漫，所以有幾多情侶因為呢類舞會而誕生，就不得而知喇！
劉天成：跑山偷懶 遭藤條侍候
聽到英華校長要拉開親密男女，就知佢都相當嚴厲啦。港鐵車務總監劉天成憶述讀書時，每年秋天都會有一次長跑，由學校出發跑上山再折返，所有學生必須參加，校長就會拎埋藤條喺山頂等候，如果發現邊個學生偷懶、跑得太慢就會打！好彩佢以前都係一個運動健將，乒乓球、籃球、足球咩都玩，所以長跑就冇太大難度，係難為一啲運動冇咁出眾嘅同學，每年秋季長跑前都要加操啫！
政制及內地事務局前副局長陳岳鵬都係英華仔嚟，直言平時以「搞事」為主，不過就唔係搞破壞，而係搞各種課外活動，例如童軍、班會等，佢話以前唔興補習班，甚至連自修室都冇，佢就聯合咗幾個班會，一齊同學校爭取開放至夜晚十點，等啲同學可以留低溫書，仲走去附近嘅茶餐廳爭取送外賣畀佢哋，佢話當時外賣不普及，叫人送嚟學校都唔容易，但經佢哋陳述貧苦學生嘅慘況後，餐廳仲送埋例湯添，認真厲害。
英華書院校長鄭鈞傑話，見證住英華幾十年嚟嘅變化，資源有明顯差距，校舍都已經大咗好多，唯一冇變嘅係學校堅持要教學生有使命感咁話。唔知校長覺得上述幾位校友又達唔達標呢？
卓妮