立法會議員可在大會動議無約束力嘅議案，討論議員或市民關注嘅議題，但由於每次大會只有兩位議員可以提出，所以要進行抽籤。今屆立法會會期已經過咗一半，六十八位議員當中，有五位議員冇乜抽籤運，兩年抽咗十二次都冇份，當中有三位屬功能界別，分別係社會福利界邵家臻、區議會（第二）涂謹申及醫學界陳沛然；而另外兩位就係直選議員葛珮帆（EQ）及何君堯。

根據最近兩次抽籤，都有起碼廿位議員提交申請，所以抽中嘅機會率只得一成，次次都咁多人去抽，而且抽中嘅機會率低成咁，難怪咁多議員抽極都冇份喇。抽咗十二次都唔中嘅EQ就坦言，好擔心去到會期尾聲都抽唔中，皆因近年政府向立法會提交具爭議性嘅議案，唔少議員喺會議上會激烈討論或「拉布」，搞到有部分議員議案積壓咗好耐都處理唔到。話雖如此，但佢話自己都算好彩，事關早前喺工程界議員盧偉國提出嘅智慧城市議案，佢就趁機提出修訂，甚至通過埋添，真係不幸中之大幸。

而另一個抽極都抽唔中嘅邵家臻就話覺得好可惜，仲話如果一個議員連提議案都做唔到，好似「好流」咁，但佢都安慰自己，話係非戰之罪喎。至於未來會否再接再厲，佢就話打算抖抖先，過多幾個月先再繼續抽喎。佢仲話，有十二次抽唔中嘅紀錄，估計再抽籤都應該有啲優勢，所以停一停都唔怕。至於漁農界何俊賢議員都有十一次抽唔中，佢就覺得個制度好公平，抽唔中都冇辦法、冇得怨，只怪自己唔好彩。不過佢就好樂觀喇，話相信喺今個立法年度應該會抽中喎。

睇番上年嘅情況，有三個民主派議員同樣抽足十二次都未開到齋，而最終佢哋都齊齊抽中，再加上今屆議員任期仲有兩年，而新一個立法年度啱啱先開始，估計幸運之神應該都眷顧佢哋嘅。話時話，如果立法會係重視議員議案，就應該預留時間討論，並非任由議案積壓，況且過去除咗周四續會外，周五早上時間都會用嚟續會，只係今屆取消咗啫，可能整整吓連動議辯論都慳番。