古人教落︰前車之覆，後車之鑑。可惜對於部分官員嚟講，對住花呢花綠嘅銀紙，莫講話吸取教訓，連老竇姓乜都唔知。好似澳門咁吖，前面走咗個「世紀巨貪」歐文龍，大大小小貪官前腐後繼，你方唱罷我登場，真係唔到你唔服。
澳門廉署公布，貿易投資促進局行政管理委員會主席、一名執行委員以及一名現於退休基金會任職廳長嘅原貿促局官員，因為喺審批不動產投資移民、重大投資移民以及技術移民申請過程中涉嫌職務犯罪，被移送司法機關。講真，澳門移民審批黑幕重重，早就唔係新聞，廉署前排至發表報告狠批貿促局處理相關申請時欠缺嚴謹審核機制，有置業移民投資唔足額仍獲批核，有「技術移民」長年不在澳門卻每月淨𢭃豐厚薪金，沒有最蠱惑，只有更蠱惑，今次落網嘅官員，分分鐘只係冰山一角。
可能大家會問，明明歐文龍被重囚二十八年半，大大個樣辦戙喺面前，點會繼續以身試法咁笨？有人就講得啱嘞，澳門政府官員無問責制，政府行政主導權力過大，缺乏制衡咯喎，貪官咪有恃無恐，為所欲為囉。以前澳葡年代經濟規模小，官員都仲話貪極貪唔出咩樣，今時唔同往日，回歸後成個社會愈來愈有錢，官員貪污誘惑大咗，監察制度卻依然鬆散，情況就好似成缸污糟水，淨係捉走條魚而唔換水，問題只會周而復始，沒完沒了。
正所謂人為財死，鳥為食亡，講到油水位，土地審批比移民審批有過之而無不及，因此亦係貪腐嘅重災區。有發展商涉嫌霸佔官地胃口愈來愈大，「地盤」由原來幾百平方米「擴充」到五萬多平方米，官老爺居然隻眼開隻眼閉；澳門政府興建離島醫院，造價超高進度超慢唔在講，仲要被指黑箱作業，設計合約冇經公開招標就批畀行政會委員，話唔係自己人圍威喂，三歲細路都唔信。
數字冇花冇假，澳門廉署舊年接獲超過一千二百宗貪污投訴及舉報，足足比對上一年增加近四成，當中超過一半涉及公職人員以權謀私、濫用職權甚至巨額詐騙。官員「貪」已經夠衰，仲要加埋「廢」，咁就真係遺害無窮。第樣唔講，淨係海關一個小小衙門，接連發生倒掛五星旗、無理扣查外國醫生團隊等鬧劇，鑊鑊新鮮鑊鑊甘，至今仍無人問責，就知咩料。
當然喇，烏鴉唔好笑豬黑，講到官場貪風，香港只係五十步笑百步，回歸後涉貪官員唔止一個比一個高級，食相仲一個比一個難睇，有人話港澳兩個特區唔係「兄弟爬山，各自努力」，而係「兄弟滑坡，各自折墮」，可謂一針見血。