中環出更：陳淑玲化悲傷為力量推動心律檢查
香港人猝死案例愈嚟愈多，但市民對如何預防就所知不多。由中華廠商聯合會常董陳淑玲（Shirley）創辦嘅遺傳性心律基金會（心律會）早前舉行成立五周年酒會。Shirley話，六年前有一晚，佢個仔喺睡夢中離世，佢喺極度震驚、難過之後，到處搵原因，先知係突發心律失常死亡綜合症（SADS），所以佢就創辦心律會，希望以過來人身份，畀市民知道點樣預防。
Shirley話，高達三成嘅猝死個案係同SADS有關，而且有遺傳性，但好少人會專登去做呢項身體檢查。過去五年佢致力催生成立專科門診，希望市民定期檢查，避免有關風險。
施祖祥退休 血壓都低咗
當天到場支持嘅政商界人士有好多，包括民政事務局常任秘書長謝凌潔貞及前常秘李麗娟、教育局副局長蔡若蓮、申訴專員劉燕卿、前立法會議員吳亮星等。李麗娟就話自己都識Shirley個仔，對一個咁注重健康同運動嘅年輕人突然離世都感到好震驚。佢讚Shirley化悲傷為力量，無私奉獻，好值得支持，希望政府喺教育市民預防SADS方面畀多啲關注。
退休多年嘅前高官施祖祥都有到場，佢係心律會董事會成員。講起健康話題，佢話港人最論盡就係太緊張、工時長、唔夠瞓兼食無定時，佢未退休前都係過緊咁嘅日子，特別係回歸前出任憲制事務司時，經常黃昏六點返屋企食飯，到夜晚九點再返寫字樓做到凌晨十二點，因為當時要同英國政府方面溝通好多有關回歸嘅重要議題，機密檔案唔可拎返屋企，加上又有時差，所以都冇符。佢笑稱依家「裸退」生活好好多，連血壓都低咗咁話。
卓妮