立法會十八個事務委員會正、副主席選舉完咗之後，早前「冧友」加入各委員會嘅議員都陸續退會，掀起一輪「退會潮」。不過，議員葛珮帆（EQ）反而喺呢個時候加入衞生事務委員會。EQ一向關注女性癌症、醫療儀器規管、中醫中藥事宜，都係衞生事務委員會討論範疇，點解佢咁遲先入會呢？EQ就話都唔知點解會冇入到呢個委員會，懷疑係早前「冧友」協調時睇漏眼，又會咁烏龍嘅？

EQ仲自爆原本一直以為已經加入咗衞生事務委員會，喺上周四委員會開會選正、副主席時佢都有去開會。點知喺委員會正、副主席選舉投票時，就被立法會秘書處職員提醒，話佢冇加入到委員會，所以唔可以投票。EQ當時先知自己冇入到委員會，仲話冇耐佢就收到病人組織發電話短訊畀佢，問佢點解唔加入委員會添。雖然EQ已經去信委員會主席陳沛然，希望重新加入委員會，但都要等委員會下月開會先知道批唔批。