政情：貿戰冧市張華峰教路按兵不動
十月向來被稱為「股災月」，今年仲要遇上中美貿易大戰，搞到恒生指數喺上半個月一度狂瀉。金融服務界立法會議員張華峰（肥老闆）都好緊張個市，就連上周立法會舉行答問大會時都手機不離手，要𥄫住個市。佢仲警告，中美貿易戰引起嘅最壞時刻仲未到，目前嘅跌市只係悲觀氣氛造成o架咋，日後實際傷害浮現，相信仲會有排跌。佢保守估計，恒指仲會再跌，希望守得住二萬三千點咁話。
料最壞時刻喺聖誕前後
肥老闆話，最壞時刻估計係喺聖誕節前後，因為屆時中國承接美國嘅無關稅訂單「尾班車」已付運，由於之後嘅新訂單要加百分之二十五嘅關稅，內地大批廠商或會遷去印尼、柬埔寨等東南亞國家，作為出口港嘅香港，自然會受到影響。
聽肥老闆咁講，咁一般市民點樣自保好呢？肥老闆就建議盡量揸現金先喇，如果資金已經入咗股市，就最好按兵不動，觀察多陣喎。