政情：競爭力排名下跌 楊偉雄死撐唔差
香港創新科技發展落後於鄰近地區，立法會議員同資訊科技界人士早已鬧爆政府慢幾拍。日前世界經濟論壇就公布二○一八年度《全球競爭力報告》，本港今年嘅排名下跌一位，僅排第七位，落後於新加坡同日本兩個同位於亞洲嘅經濟體，而喺細項創新能力方面更係只排第二十六位。雖然該份報告矛頭直指本港創新能力唔夠，但負責嘅創新及科技局局長楊偉雄就繼續死撐，仲話睇番報告入面，本港喺某啲部分係比其他亞洲地區排名高，覺得值得驕傲咁話。
話部分創科排名高過星日韓
楊偉雄尋日出席電台節目時，就提到世界經濟論壇本周二公布嘅新一份《全球競爭力報告》。對於報告指本港創新能力等方面遜色，佢就死撐話本港嘅創科其實仲有優勢，例如喺「創新公司增長」方面，本港排行第十一位，而其他亞洲地區中，日本排第十三位、新加坡同南韓就分別排行第二十位及第三十七位。至於喺「擁抱顛覆意念公司」方面，本港排名第八位，新加坡、南韓同日本就分別排第十六位、第三十五位同第三十八位，認為根據呢個排名，本港喺亞洲地區嚟講都唔算差，仲算係幾叻喎。
其實本港創科排名都唔係淨係今次落後於人，今年六月瑞士洛桑管理學院發表嘅二○一八年全球數碼競爭力排名報告中，本港都由排名第七位跌至第十一位，該報告指出本港喺教育、科研嘅公共開支偏低，創科公司數目少，係本港跌出十大嘅死因。
承認港研發落後 不能只靠政府
楊都不得不承認本港喺研發方面比較落後，喺研發嘅投入僅佔生產總值百分之○點七，所以政府已計劃喺二○二二年將公私營研發投入總額增加至佔生產總值百分之一點五、即約五百億港元。仲要等到二○二二年，真係蚊都瞓喇。
楊仲話，如果要改變係唔可以只靠政府，好似美國、新加坡同埋深圳等地嘅私營企業所投入嘅資金都比政府多，但香港依家就掉番轉，所以會推出「超級扣稅」，希望可以刺激到更多人投資科研。講到尾，係咪又旨意私人企業自己去做呢？創科局成立至今都成三年，但本港創科發展就未見起色，楊如今仲只識死撐，真係要檢討吓喇！