中環出更：民協疑甩轆 區會取消授權票流產
深水埗區議會今年中成功取消授權票制度後，民主派就計劃喺十八個區議會動議撤銷授權票。尋日屯門區議會財經、行政及宣傳委員會討論由民協區議員甄紹南提交文件動議嘅撤銷授權票制度，但據悉因為文件冇寫和議人，終由動議變純討論，喺冇表決下收場，唔通甄做咗三年區議員仲搞錯會議程序？
指手民之誤 錯有錯着
據悉建制派喺會上一致反對議案，認為授權票行之有效，仲話如果有議員遇到紅白二事或地區事務，咁授權畀其他人都好合理喎。而根據會議常規，如果動議冇人和議，則屬無效，所以該會主席就建議甄紹南補番程序，等大家可作表決，但最後甄話唔需要表決，而且會上亦有人反對表決，所以最終變成純粹討論。
甄強調今次唔係甩轆，話純粹係手民之誤，唔應該用「動議」呢個字眼，但佢覺得錯有錯着，事關議案一旦變成動議，分分鐘會被建制派乘機提出修正案並通過，而且表決後有排都冇得重提議案添，所以今次係不幸中嘅大幸喇。不過，就算冇表決，佢喺短時間內都唔可以重提有關議案。