中環出更：生食鯇魚唔衞生？廖漢輝：順德人有方法
早前有電視節目教人去廣東順德、惠州歎鯇魚魚生，搞到食物安全中心及衞生署急急澄清，勸喻市民勿食淡水魚生，認真尷尬。早幾日卓妮喺一個酒會上見到香港順德聯誼總會副主席廖漢輝，佢都試過生食鯇魚，但係近年就盡量少食。佢仲話當地人世世代代都咁食，好難斷言食定唔食好喎。
廖漢輝話，當地人認為細菌存在於血液中，所以只要清除晒血管、血絲同埋紅色肉，只係食顏色通透嘅白色魚肉就冇問題。不過因為要確保徹底清除晒帶菌嘅血絲，所以都好考刀工o架。
定如凈為環保轉食素
香港玉器批發零售商協會會長陳榮欣都好鍾意食魚生，不過就唔會食淡水魚。佢話食魚生最緊要幫襯相熟嘅餐廳，因為同老闆熟，就唔會畀唔靚嘅魚生招呼佢。最近，佢就同屋企人去咗日本玩，以為佢都會大擦魚生啦，點知佢就話日本和牛仲靚，所以去日本反而唔食魚生喇。
轉頭見到藝育菁英理事會成員定如凈（Mediha）同埋細佬定光傑。講開食嘢，Mediha早前開始食素，佢話如果出街遷就唔到，先至會食少少海鮮，希望唔好殺生之餘，亦為環保出一分力。
Mediha係資深藝術家，原本係畫油畫，最近開始學畫現代水墨畫。佢話，早幾年認識藝育菁英主席方黃吉雯之後，藉由其主辦嘅全球水墨畫展而對中國水墨畫改觀。傳統水墨畫係黑白為主，佢認為好悶，但依家用料更加色彩繽紛，有啲仲會用上裝置藝術，變得好好玩咁話。
卓妮