曾經有個牙膏廣告係咁講嘅：「睇牙醫使乜驚呀？」不過現實中公立醫院危機四伏，病人求診同搵命博冇乜分別，呢，最近就有市民入醫院剝牙，結果居然飛來橫禍，搞到腦部缺氧，生勾勾行入去，成個癱咗出番嚟，點到你唔驚！
話說一位四十幾歲嘅壯漢，早前因為牙痛兼夾下頜腫脹，漏夜走去威爾斯親王醫院急症室求醫，被診斷患有牙原性感染同蜂窩組織炎，咪聽個名好似好複雜咁，查實剝牙、放膿就搞掂，點知壯漢出院半日後出現頸腫、發燒，再睇急症，醫生至話原來係更嚴重嘅口腔底蜂窩組織炎，要即時麻醉開刀喺咽喉放膿，術後醫生拔走氣喉，病人立即缺氧兼心臟停頓三分鐘，最終雖然經搶救執番條命，但係就從此癱瘓。
講真，公立醫院醫療事故五花八門，無奇不有，打錯針、派錯藥、輸錯血、開刀時左右腳甚至左右腦掉轉，大家早就見怪不怪，但惡化到剝牙變癱瘓，就實在太過匪夷所思，可能打鑼搵勻全世界都搵唔到第二例，唔怪得家屬質疑醫療失誤。不過老規矩嘞，院方一味死撐，強調整個過程依足指引，有晒證據證明合乎程序，對於病人出現併發腦部缺氧，深表遺憾云云。
咪畀人批中，院方拋出大量專業名詞，分明恰家屬不明就裏，等佢哋知難而退放棄追究。不過話又講番轉頭，就算追究又如何？香港地醫醫相護嘅文化根深柢固，成立調查小組調查完一大輪，咪又係掟份報告出嚟，將責任歸咎於「不幸」，頂多求其提幾條新指引當交差，然後就笑罵由人笑罵，庸醫我自為之。苦主除咗求助第四權，踢爆白色巨塔嘅黑幕，仲可以做乜？
講起就唏噓，曾幾何時，本港公立醫療系統傲視全球，香港人以公共醫療自豪，點不知回歸後港府管治水平每況愈下，醫療水準、服務質素一併淪落，市民排公院睇專科門診，閒閒哋排三幾年，小病都拖到變大病，好唔容易輪到睇醫生，隨時治病不成反被害。有人話，市民一隻腳踏進公立醫院，另一隻腳就踏入閻王殿，就係咁解。
香港話就話係國際大都市，查實醫療質素仲衰過第三世界。好似剛果咁，夠窮夠落後喇啩，但醫護人員勝在夠仁心仁術，咪一樣出到個諾貝爾獎得主，反觀香港班大國手，一個二個「月球人」、「星球人」，但醫術差，醫德仲差，點對得住「白衣天使」、「懸壺濟世」嘅稱號呀。計功夫茶話齋，講乜都假，香港一日唔改革醫療制度，一日唔打破醫界閉關自守嘅局面，比剝牙變癱瘓更離譜嘅醫療事故，肯定陸續有來！