政情：公民講場：高官塗脂抹粉民望照插晒水

政府經常對其施政自吹自擂，又成日吹噓到啲政策措施有幾多已落實，但有學者就批評一班高官淨係識用「政治化妝術」，尋日有民調更狠狠摑咗政府一巴。香港大學民意研究計劃最新民調顯示，作為政府第二把交椅嘅政務司司長張建宗評分跌穿合格水平；掌管法治、但應告唔告嘅律政司司長鄭若驊更係三位司長中評分最低；而局長中就以滅鼠不力嘅食物及衞生局局長陳肇始支持度下跌得最多。睇嚟民調已證明，佢哋三個就算點幫自己塗脂抹粉，都逃唔過市民雪亮嘅眼睛。