政情：獲城大頒榮譽院士 黃俊康沙頭角搞抗戰文物徑

家人曾加入游擊隊抗日

自幼喺深圳長大，黃俊康喺八○年返香港發展，鄉下喺沙頭角以前係禁區，當時真係好偏遠，請個工人入去做嘢都好困難，原居民就有五年期嘅禁區紙，唔使次次都申請入去。佢話沙頭角當年係抗日基地，家人曾經加入游擊隊參與抗日戰爭，叔叔犧牲性命，舅父其時被俘虜而被打至殘廢，呢支部隊亦救出多位文化人。

佢話沙頭角當年被日本仔掃蕩多次，依家仲有抗戰紀念碑，佢打算喺沙頭角嘅石涌凹等多條村，搞抗戰紀念文物徑，亦會喺原有嘅建築物改建為紀念館，之後再逐步喺西貢、元朗十八鄉及大嶼山搞抗戰文物徑咁話。