政情：馮卓能腳頭好 避過飛燕山竹
仁濟醫院主席馮卓能（Clement）上任之後，比以前忙咗好多，連剛過去嘅暑假都冇時間帶三個子女去旅行。Clement話，暑假期間忙於帶交流團，之前就帶一班教師去日本進行交流，咁啱佢太太亦都帶兩個小朋友參加日本嘅遊學團，所以佢喺小朋友交流完之後，就順便接埋太太同小朋友返香港喇。唔通Clement諗住接佢哋返港，就當陪咗去旅行？
Clement仲話，咁啱暑假帶兩個交流團都遇上超強颱風，第一次去日本時遇上令關西大水浸嘅「飛燕」，好彩佢喺颱風吹正日本前已經返港。第二次係被喻為「地表最強」嘅颱風山竹襲港，佢咁啱已經帶團飛咗去泰國。兩次都同颱風失之交臂，Clement真係好彩。
山竹造成唔少損壞，Clement屋企有冇成為災難現場呢？佢就話雖然住喺獨立屋，但因為一早已將屋外嘅盆栽搬咗入屋，又將啲傢俬搬離窗邊，所以完全冇事咁話喎。