政情：謝偉銓 范國威 設置新議辦 開支相差12萬
今年三月進行咗立法會補選、填補咗前年「宣誓風波」中所產生嘅三個地區直選及建築界功能界別嘅議席。而四人嘅議員生涯已經過咗接近半年，請人、開設辦事處等工作都將近完成，到底邊個最慳家，邊個最洗腳唔抹腳呢？
立法會議員每屆任期內，可以申領唔超過三十七萬五千元開支償還款額，用喺開設辦事處、購置資訊科技及通訊設備，而議員任內購置嘅資本項目，喺任期屆滿時要交還秘書處，議員可按秘書處訂嘅折舊價或原有價值百分之五去買番。
范國威用八萬幾買晒所有嘢
四名議員包括咗重返立法會嘅新界東議員范國威同建築界嘅謝偉銓，同埋新入立法會嘅鄭泳舜同區諾軒，四人都係經今年三月嘅補選進入議會，因為係新任議員而未曾設過辦事處，所以都要花唔少錢去添置器材。翻查四人直至今年六月份嘅開設辦事處及資訊科技開支償還款額申領表，最慳家嘅議員係范國威，用咗唔使九萬元，當中買過一部廿三吋電視機，而最貴嘅就係購入一部輕巧型專業級數碼攝錄機，價值為一萬零六百元，另外亦買咗至少五部同型號手提電腦、一個手寫板同一部雪櫃。
排第二嘅係鄭泳舜，但佢嘅使費已經比范國威多出接近十萬元，大約十八萬五千元，其中買咗兩部分別四十三吋同四十吋嘅電視，亦花逾三萬六千元購入iMac Pro，更花咗近三萬八千元買家具，包括有辦公枱、布屏風、辦公椅等等。區諾軒就一共使咗近十九萬四千元，添置咗辦公椅、會議枱等家具，亦佢名副其實為Apple擁躉，買咗三部MacBook Pro，同一部iMac Pro，使咗超過五萬五千元落呢個品牌。
謝偉銓用最多 埋單超過21萬
至於謝偉銓就花費最多去布置辦事處，使咗超過廿一萬元，單係4K電視機都有兩部，分別為五十五吋同四十三吋咁大部，合共花逾一萬三千元。而佢同樣鍾情Apple，而且種類繁多，分別有手提電話、平板電腦、手提電腦到桌上電腦都有，連Apple TV都買埋，以及相關產品嘅保養同支援服務，而佢申報Apple TV時就標明用喺會議時輸出電腦檔案去電視機喎。
其實，佢花費最多嘅項目就係辦公室家具，即使有報價比較三間價錢，都使咗超過十萬元，睇嚟佢對辦公室設備同布置都幾有要求，唔知咁嘅環境下工作係咪特別有效率呢？