中環出更：徐汶緯細個煮飯冇撳掣 三兄妹捱餓
近年「智慧城市」可謂是社會趨勢，稻苗學會十五周年晚會都以「智慧餐飲」為主題，仲展示咗各種可以控制溫度、運送食材，甚至3D餐牌嘅嶄新科技，實行全行業一齊改革發展。睇落就好先進，但其實佢哋喺傳統餐飲業都打滾咗好多年，細細個就入廚房嘅多不勝數。例如該會主席徐汶緯，幾歲就開始幫手煮飯，有時仲要負責三兄妹返學前嘅膳食，但小朋友做嘢難免有啲甩漏，間唔中都會落咗米但唔記得撳掣，結果三兄妹惟有餓住個肚返學喇！
徐汶緯話最拿手係煎午餐肉，畢竟細個時成日都食，所以午餐肉要切幾厚、煎幾耐已拿捏得非常精準。至於該會會長邱金榮最叻就係炆雞，雖然佢喺屋企排行第二，但哥哥對煮食完全唔感興趣，好多時佢媽咪煮飯，都係佢喺隔籬睇住學，後嚟大個做廚房，試過見到啲師傅炒龍蝦，諗起屋企都好少食海鮮，就依樣葫蘆煮畀屋企人食，結果賣相差咗啲，但整體而言都算合格。
鄭肇琪落舖頭幫手搣魚蛋
該會副主席林穎詩、委員鄭肇琪亦係從小開始接觸廚房，但唔係屋企而係喺舖頭。林穎詩話讀幼稚園已經要幫手遞餐牌，大個少少夠力遞水後就開始同啲伙記爭搬餐！當時佢仲留咗條好長嘅鬢辮馬尾，結果啲熟客每次搵佢就會拉佢條馬尾，真係慘喇！鄭肇琪細個就多數幫手搣魚蛋，最記得以前舖頭位置成日水浸，對生意影響好大，好在後期有工程改善咗有關情況，生意先可以做到今時今日。
個個都咁熟手，但會長兼餐飲業行業培訓諮詢委員會主席黃傑龍反而話唔係好識煮食，更有趣嘅係佢自問有天分，只係應用機會唔多，發揮有限。不過佢都有兩樣拿手小菜，一係煎牛扒，二係煮公仔麵，特別係公仔麵佢堅持要自己煮先會食，事關佢煮完麵之後會換一煲新水，先再加味粉，最後加麻油，認為咁先係最好食。
卓妮