政情：視許鞍華偶像 吳文華話對談好開心
如果可以同偶像見面，相信唔少粉絲都會覺得興奮。香港各界婦女聯合協進會早前搞咗場《與許鞍華對話》影藝座談會，立法會前秘書長吳文華（Pauline）獲邀做主持人，同導演許鞍華暢談。原來Pauline係許嘅粉絲，難怪佢直言好開心喇！
Pauline話，自從睇過許鞍華拍嘅《女人四十》之後就迷上咗佢，好鍾意許嗰種「不經意」嘅表達手法，將市井小民嘅情感，透過日常生活表達出嚟，唔似拍戲，呢啲係佢最鍾意嘅電影類型。
從許電影學到同老幼相處
佢話亞洲人比較含蓄，好少直接表達感受，從許嘅電影可以學到點樣同長者、小朋友相處，或者鄰舍之間如何互相幫忙，笑稱許嘅電影都影響佢唔少。
雖然許取得咁大成就，但Pauline強調許都經歷過好多高低起跌，最嚴重嘅低潮期仲長達十年，所以佢奉勸時下嘅年輕人唔好太易放棄，咁就一定會有成功機會。