中環出更：做實習生練出絕技 馮興禮自詡影印之王
唔少政府部門都會喺暑假期間招攬實習生，幫手處理雜務。勞工及福利局局長政治助理馮興禮（Henry）亦曾經做過實習生，佢自爆當年喺辦公室連張枱都無，返工九粒鐘都喺間影印房入面，淨係負責影印，結果返咗工一個半月，佢嘅影印技術已去到爐火純青，唔單止可以同時操作兩部影印機，仲練到影印時唔使「閂蓋」，依家喺勞福局係影印不求人咁話。
快手唔閂蓋吸臭氧
回想當年，Henry話每日要喺房「閉關」摩打手影印，由於要快手唔「閂蓋」，所以每次影印發出閃光時，佢就要夾啱時機擰開塊面，不過有影印機運作時發出嘅臭氧就避無可避啦。Henry自言擅長發吽哣，笑言「唔知係咪當年吸臭氧吸得多」，所以搞到個人有時會呆呆哋。
影印係唔少公務員嘅「基本功」，Henry對自己嘅影印技術充滿信心，話喺勞福局辦公室當中，影印技術都係頂尖嗰班，仲話平時開會或者整文件，需要影印時都唔會假手於人，一於自己落手當練習喎。
卓妮