中環出更：議員扮美少女嫦娥慶中秋惡心定悅目？
一年容易又中秋，相信呢幾日電話都收到大量「長輩圖」，而本年度最新一輯中秋圖，就有立法會議員陸頌雄（Michael）化身美少女戰士，又有立法會議員蔣麗芸（阿Ann）同南區區議員、前港姐任葆琳一齊扮嫦娥！但唔少網民喺貼文留言話感到不安，又有人話「講還講唔好貼圖」，咁到底係賞心悅目定係惡心呢？留待大家自行判斷喇！
陸頌雄話「代表月亮消滅你」
率先打頭陣，就係Michael化身美少女戰士嘅月野兔，話去年香港人浪費咗二百二十七萬個月餅，如果層層疊高度接近一百公里，所以呼籲市民將啲食唔晒嘅月餅，食多幾日或者轉贈畀有需要嘅人。佢仲鬼馬咁用月野兔嘅台詞，叫市民一齊向月餅講「替月行道」，要「代表月亮消滅你」。但可能管理社交網站專頁嘅同事都唔太頂得順，最後都溫馨提示大家，食嘢時千祈唔好打開貼文嚟睇。
然而相傳中秋節時，係嫦娥奔月之日，所以阿Ann同任葆琳都齊齊化身嫦娥。阿Ann嘅卡通圖身穿古裝服扮嫦娥，舉起左手輕摸頭髮，右手輕輕挽起一隻小白兔，驟眼睇落都幾襯古裝打扮。
至於任葆琳嘅造型就同阿Ann稍稍不同，更似敦煌壁畫常見打扮，更有古典美感，佢更將自己個樣印在一個月餅盒上，又笑話幅圖靚到唔似樣喎。有網民笑稱，叫任葆琳都係扮觀音娘娘喇，任葆琳就回覆話要留番做秘密武器鬥大佬，又有網民話張圖有啲格格不入，但靚樣搭救晒喎。
卓妮