政情:災後交通資訊混亂 黎棟國批政府漏招

山竹襲港搞到香港公共交通大癱瘓,大批要返工嘅打工仔怨聲載道,政府畀人鬧爆「堅離地」。保安局前局長黎棟國卸任後都鮮有批評政府,今次就連佢都質疑政府「漏招」,冇盡早喺市民出門口前發放資訊,直言政府要檢討災後向市民發放資訊嘅措施咁話。

促提早發放 市民可作準備

黎棟國卸任局長一年多時間,最近加入由立法會議員葉劉淑儀創立嘅新民黨,出任該黨常務副主席,佢尋日罕有地同葉太一同出席電台節目,回應政府處理風災嘅工作情況,佢話市民早知第二日改發三號風球就要返工,質疑政府之前一晚係咪可以知道香港兩條交通「大動脈」,即巴士同鐵路會喺某一點被阻塞,提醒市民出門嘅話會等好耐接駁交通,等佢哋有所準備。

黎棟國又話政府喺掌握資訊下,如果可以盡早喺市民出門前發放資訊,就可以減低交通壓力,市民感受亦會好啲︰「重要嘅係訊息要好明確、及時,讓市民理解,市民自己會有唔同因素影響決定」。連離開官場後少有評論政府工作嘅黎都出聲,睇嚟政府今次真係要好好檢討災後發放訊息機制喇。

第一手消息請下載on.cc東網iPhone/iPad/Android/Windows Phone Apps