中環出更：張炳良護短 唔信陳帆山竹善後潛水
運輸及房屋局局長陳帆喺颱風山竹襲港之後玩失蹤，即使香港交通因為「山竹」搞到大癱瘓都未有現身解畫，唔止市民鬧爆，有政團更要求佢落台添。不過，任內因為廣深港高鐵問題而被猛烈批評嘅運房局前局長張炳良，尋日竟然護短，話唔信陳係「潛水」，又聲稱風災或由保安局統籌，陳毋須現身。
開脫應變慢非港府責任
曾為政府熱廚房一員嘅張炳良話，政府內部有分工，今次風災可能係由保安局統籌，「可能包括埋交通」，相信運房局都有參與善後安排，「陳帆肯定有牽涉在內」，唔認為陳喺風災後玩失蹤。幫完陳解圍後，佢又嘗試再下一城幫港府開脫，話天文台喺本周一清晨五點左右，先將八號風球改掛為三號，距離上班時段剩番好少時間，反應唔嚟只係「不幸」，而唔係港府責任喎。
跟住佢又大呻近年做公務員唔會獲得市民掌聲，又話自己早年擔任消費者委員會主席時，都不時收到市民嘅感謝信，但係依家市民只會將政府服務視為「理所當然」，呼籲有意投身公務員嘅人要有心理準備咁話。
卓妮