政情：山竹拆招牌 葉文斌樂觀話夠貼地
屯門區議員葉文斌同立法會議員麥美娟嘅聯合辦事處遭到破壞，但唯獨葉文斌嘅招牌被拆，到底佢係咪得罪人畀人尋仇呢？
其實呢個位於屯門安定邨嘅聯合辦事處，喺早前超強颱風山竹吹襲時被吹爛招牌，但颶風就只係吹爛咗葉文斌嗰塊（右圖），麥美娟嘅招牌仍然非常堅固，穩如泰山喇！
葉文斌今次被拆招牌，睇嚟唔係好兆頭喎，但佢就有另外嘅解讀，話招牌都跌得落地係代表夠貼地喎。佢仲話遲啲會裝番新招牌上去，但呢段時間無招牌用都無有怕，因為街坊去買餸會經過辦事處，而且開咗一段時間，街坊都記得去邊搵佢。
馮沛賢橫額紅底褲掛頭
另外，麥美娟一張橫額亦都出事，但佢繼續安然無恙，輪到另一拍檔屯門社區幹事馮沛賢橫額遭紅底褲掛頭，馮就估計今次係惡作劇，因為風後巡區時未有察覺，直至尋日先收到唔少熱心街坊通知。不過街坊就安慰佢，話依家夠鴻運當頭，應該要買六合彩咁話！
