中環出更：準媽媽有要求 梁君彥等容海恩上報
立法會明年就會迎來首個BB喇！議員容海恩（Eunice）已懷孕四個多月，預產期係明年二月，作為首位任內生B議員，佢早前已經公開要求立法會增加多啲配套。立法會主席梁君彥尋日出席活動後話，Eunice列張清單，詳細寫低要求乜嘢，行政管理委員會就盡量配合。
做得到都會盡量配合
問到有議員懷孕，立法會有乜嘢配合？梁君彥都好輕鬆話，Eunice有乜嘢要求，只要做得到，都盡量配合。至於要求想放產假又投票，佢就話《基本法》列明要議員在席先可以投票，咁係咪要改呢？就要度度喇，或者可以先喺議事規則委員會討論先。
查實政府一直提倡釋放婦女勞動力，又主張友善家庭政策，咁立法會應該做個好榜樣，藉此完善政策同設施，先可以鼓勵更多有能力嘅女士從政，再加上有議員講明會跟進有關議員產假嘅問題，梁君彥都知道呢個問題係絕對冇得迴避。睇嚟準媽媽Eunice都唔可以齋噏，係時候認真幫BB諗吓要乜喇！
卓妮