中環出更：嚴志明鍾意靈活辦公室 用簾自由組空間
近年各式各樣嘅共享空間愈嚟愈多，而香港工業總會轄下嘅香港初創企業協會最近就開辦咗「INDEX工創空間」，唔單止係提供共享空間，仲匯集咗大批工業家，包括商界、科研界、學術界同設計界等，唔單止提供地方，仲有經驗同人脈，睇落比普通共享空間更吸引。該會日前舉辦開幕禮，香港設計中心董事會主席嚴志明睇完都讚不絕口。
嚴志明特別鍾意一個靈活嘅辦公室設計，可以用簾快速、自由咁組成一人或多人嘅空間，又有小型工作枱兼備畫板，開會非常方便，佢又話香港依家寸金尺土，呢種設計好適合用於非經常留喺辦公室工作嘅工種，咁就可以慳番好多地方喇！
在場仲見到商務及經濟發展局前局長蘇錦樑（Greg蘇），仲話其實呢個計劃係佢同該會「一齊生嘅BB」！所以依家就係「睇住BB出世」，實在係非常滿意、好開心。佢話計劃最初係佢諗出嚟，然後拉攏埋工總、地產商一齊去做，事關佢發現有啲地產商有工廈地方可以用，所以就提議拎出嚟畀年輕人用，以跨界別嘅形式製造更多價值出嚟，當時搵咗工總之後，唔少工總成員畀過一啲實際建議，令個計劃可以一步一步咁落實，最終可以夢想成真，大讚工業界支持年輕人創業。
郭振華：想畀新鮮感年輕人
雖然Greg蘇講到好容易咁，但查實工總主席郭振華就話落實計劃花咗唔少時間，遇過好多困難，事關為咗畀年輕人有更多新鮮感，佢哋喺活化工廈時花過唔少努力，例如工廈本身有好多防煙門、舊式冷氣，所以並唔能夠單靠翻新就可以變成工創空間，而要將成個環境重新設計過，過程絕對唔輕鬆！所以郭振華都話錢係其次，最重要係佢哋真係放咗好多心思落去，務求提供一個最好嘅空間畀年輕人發展！
卓妮